Vertskap i turistinformasjonen i Lom

Gira på å jobbe blant Norges høgaste fjell i Jotunheimen i sommar?

Visit Jotunheimen søker vertskap til turistinformasjonen i Lom sentrum i sommar, Vi er på jakt etter fjellglade, positive og serviceinnstilte medarbeidarar som vil jobbe med å veilede turistar og informere om tilbod og aktivitetar i Lom og Jotunheimen.

Med base i nasjonalparklandsbyen Lom, med Galdhøpiggen, Glittertind og høgdemetervis med 2000-meterstopper i «bakhagen», er dette ei unik sjanse til å utfolde seg i kremen av Fjell-Norge, og bidra til å freiste enda fleire til å oppleve den unike naturen, aktivitetane, maten og kulturen.

Arbeidsoppgåver og ansvarsomåder: 

• Vertskap i turistinformasjonen i Lom – med fysiske besøk, førespurnader per telefon og e-post, samt sal av varer vi har i butikken.

• Bidra til god kommunikasjon og samarbeid mellom reiselivsaktørane.

Vi ser etter deg som: 

• er glad i å prate med folk, og som minimum beherskar norsk og engelsk flytande.

• har god kjennskap til aktivitetar og tilbod i Lom og Jotunheimen.

• har relevant utdanning eller erfaring frå reiseliv og destinasjonsutvikling.

• har stor arbeidskapasitet og som likar å jobbe i eit hektisk og kreativt miljø.

Vi kan freiste med: 

• Utfordrande og variert jobb i eit spanande og aktivt miljø.

• Moglegheit til å påverke vertskapskonseptet vårt som ein kombinasjon av digital og personleg formidling.

• Arbeidsstad på ein av dei mest attraktive høgfjellsdestinasjonane i Norge.

• Løn etter avtale.

Om Visit Jotunheimen:
Visit Jotunheimen er reisemålselskapet for Jotunheimen, Lom og omland. Vi samarbeider med lokale aktørar innan overnatting, mat, aktivitetar og kultur for å gje deg den beste opplevinga i hjarta av den norske fjellheimen.

Den offisielle turistinformasjonen i Lom ligg på Nilsbue, i eit brunt hus ved rundkøyringa midt i Lom sentrum. Her får du nyttig informasjon om aktivitetar, arrangement, overnatting, servering og handel i og rundt Lom og Jotunheimen.

Vi har utsal av fjell- og fritidsartiklar. Her finn du eit godt utval av turkart for mellom anna Jotunheimen, samt vegkart og ulike turbøker. Vi fører òg eit utval av turmat og gass til fjellturen, og sel profilartiklar som t-skjorter, luer, buff, trekoppar etc.

• Vi er tilgjengelege på e-post og telefon heile året
• Ekstra bemanning og helgeope i juni, juli og august.
• Du finn offentleg toalett på utsiden av bygget. Dette er ope mot betaling heile året.